دوای گیانلەدەستدانی ئافرەتێکی تەمەن ٢١ ساڵ لە نەخۆشخانەیەکی تایبەت لە شاری هەولێر، وەزارەتی تەندروستیی هەرێمی کوردستان ڕاگەیەندراوێکی بڵاو کردەوە و تێیدا ئاماژەی بەوە دا کە پزیشکی نەشتەرگەر هیچ ڕێگەپێدانێکی نەبووە لەو نەخۆشخانەیە کار بکات و ناوی لە لیستی وەزارەتدا نەبووە.
بەپێی ڕاگەیەندراوەکە، هۆڵەکانی نەشتەرگەریی ئەو نەخۆشخانەیە لە سەرەتای مانگی شەشی ئەمساڵەوە بە بڕیاری فەرمی لەلایەن وەزارەتەوە داخراون، چونکە مەرجەکانی سەلامەتیی نەخۆشیان تێدا نەبووە، بەڵام پزیشک و ئیدارەی نەخۆشخانەکە بەشێوازێکی نایاسایی و لە دەرگای نافەرمییەوە چوونەتە ژوورەوە و نەشتەرگەرییان ئەنجام داوە.
وەزارەتی تەندروستی بڕیاری داوە نەخۆشخانەکە داخات و ئیدارەی نەخۆشخانەکەش لەگەڵ ئەنجامدەرانی نەشتەرگەرییەکە ڕادەستی دادگا بکات بۆ ئەوەی ڕکاری یاساییان بەرامبەر بگیرێتە بەر.