عەلی فالح ئەلزەیدی، سەرۆکوەزیرانی عێراق، لە وتارێکی توند و هەستیاردا لەبەردەم پەرلەمانی وڵاتەکەی ڕایگەیاند کە بەرپرسیارێتیی تەواوی بڕیاری گۆڕینی بەهای دینار هەڵدەگرێت، جەختیشی کردەوە کە قبووڵ ناکات مووچەی فەرمانبەران بسوتێنرێت یان ٣٥٪ی بڕدرێت.
ئەلزەیدی لە وتارەکەیدا کە کاردانەوەی فراوانی لێکەوتەوە، ڕوونکردنەوەی دا کە ئامانج لە گۆڕینی بەهای ئاڵوگۆڕ ڕووبەڕووبوونەوەی قاچاخچی و قازانجپەرستان بووە، نەک بارگرانی خستنە سەر شانى هاووڵاتییان.
خاڵە سەرەکییەکانی وتارەکەی سەرۆکوەزیران:
بەرپرسیارێتیی بڕیارەکە: سەرۆکوەزیران ئاماژەی بەوە کرد کە ئەگەر بڕیارەکە دەرئەنجامی نەرێنیشی هەبێت، تەنها خۆی بەرپرسیارێتییەکە هەڵدەگرێت و هێزە سیاسییەکان و ئەنجومەنی وەزیران هیچ پەیوەندییەکیان بەم بڕیارەوە نەبووە.
ڕێگری لە قاچاخچییەکان: ئاماژەی بەوە دا کە پێشتر نرخی فەرمی ١,٣٢٠ دینار بووە کەچی لە بازاڕدا بە ١,٦٠٠ دینار فرۆشراوە، بەڵام ئێستا بە گۆڕینی بۆ ١,٥٢٠ دینار، ئەو جیاوازییە لە قاچاخچییەکان سەندراوەتەوە نەک لە هاووڵاتیی ئاسایی.
رەتکردنەوەی بڕینی مووچە: ئەلزەیدی بە توندی ڕەخنەی لە پێشنیازی لایەنەکان گرت و گوتى: "کەس پێم نەڵێت مووچەخۆر بۆ ماوەی چەند مانگێک بێ مووچە دابنیشێت، یان ٣٥٪ی مووچەکەی ببڕین و بە بەڵێن ژیانی بۆ دابین بکەین؛ من ئەم چارەسەرانە و قەرزکردنی زیاتری دەوڵەت قبووڵ ناکەم."