–حکوومەتی هەرێمی کوردستان، بەرەبەیانی ئەمڕۆ هەینی، 11 گەنجی تری دەڤەری ڕاپەڕین کە لە وڵاتی لیبیا گیریان خواردبوو، بە سەلامەتی گەڕێندرانەوە هەرێمی کوردستان و ڕادەستی کەسوکاریان کرانەوە.
دوای ئەوەی لە ماوەی ڕابردوودا هەواڵی بێسەروشوێنبوونی ژمارەیەک لە گەنجانی دەڤەری ڕاپەڕین بڵاو بووەوە، مەسرور بارزانی، سەرۆکی حکوومەتی هەرێمی کوردستان، هەردوو وەزارەتی ناوخۆ و فەرمانگەی پەیوەندییەکانی دەرەوەی راسپارد کە بەپەلە ڕێکاری پێویست بۆ دۆزینەوە و گەڕاندنەوەی ئەو گەنجانە بگرنەبەر.
قۆناغەکانی گەڕاندنەوەی گەنجان:
گەڕاندنەوەی یەکەم: چەند هەفتەیەک لەمەوبەر 33 گەنج دۆزرانەوە و گەڕێندرانەوە.
گەڕاندنەوەی ئەم دواییە: دوای دەستنیشانکردنی 14 گەنجی تر، لە چەند ڕۆژی ڕابردوودا 3 گەنج و بەرەبەیانی ئەمڕۆ هەینیش 11 گەنجەکەی تر گەیندرانەوە خاکی هەرێمی کوردستان.
ڕادەستکردنەوە بە کەسوکار: لە فڕۆکەخانە، دوای ئەنجامدانی پشکنین و چارەسەری پێویست لەلایەن تیمە تەندروستییەکانەوە، تیمەکانی وەزارەتی ناوخۆ سەرجەم گەنجەکانیان بە سەلامەتی ڕادەستی خێزانەکانیان کردەوە.
لە ئێستادا هەوڵە چڕەکانی حکومەتی هەرێمی کوردستان بۆ سۆراخ و دۆزینەوەی 10 گەنجی دیکەی دەڤەری ڕاپەڕین بەردەوامە.
حکوومەت جەخت لەوە دەکاتەوە کە بەهۆی ئەو هەنگاوانەی بۆ سنووردارکردنی کۆچی نایاسایی ناویەتی، ڕێژەی کۆچکردن لە چەند مانگی ڕابردوودا بە شێوەیەکی بەرچاو کەمی کردووە.