ئاژانسی هەواڵی تەسنیم سەر بە سوپای پاسدارانی ئێران، لە ڕاپۆرتێکدا ڕایگەیاندووە، کە پچڕانی ئینتەرنێت لە کاتی شەڕدا بە پێویستییەکی نیشتمانی و بەشێک لە سەروەریی وڵات دادەنرێت.
ئاژانسی تەسنیم ئاماژەی بەوە کردووە، لە سەردەمی جەنگە هێبریدەکاندا، کۆنترۆڵکردنی ئینتەرنێتی نێودەوڵەتی بووەتە "ستانداردێکی بەرگریی جیهانی".
دەشڵێت: هیچ دەوڵەتێکی بەهێز لە جیهاندا ئاسایشی ژێرخانەکانی خۆی ناکاتە قوربانیی رەوتی ئازادیی زانیارییەکان لە کاتی شەڕدا.
لە بەشێکی دیکەی ڕاپۆرتەکەدا هاتووە، کە پچڕاندنی ئینتەرنێت لە کاتی تەنگژە سەربازییەکاندا، ڕێکارێکی پەسەندکراو و یاسایەکی نوێیە لەسەر ئاستی جیهان، چونکە پاراستنی سەقامگیریی ناوخۆیی و ڕێگری لە زانیاریی چەواشەکارانە لە پێشینەی کارەکاندایە.
ئەم لێدوانە لە کاتێکدایە کە لە ئێراندا لە کاتی ناڕەزایەتی و سەرهەڵدانی گەل و شەڕدا هێڵی ئینتەرنێت بە تەواوی دەبڕدرێت و پەیوەندی 90 ملیۆن کەس لەگەڵ جیهانی دەرەوە ئاستەنگ دەکرێت.