تولای هاتیمۆغۆڵاری، هاوسەرۆکی گشتیی پارتی یەکسانی و دیموکراسی (دەم پارتی)، لە دووەمین کۆنگرەی ئاسایی پارتەکەی لە شاری ئەرزەڕۆم ڕایگەیاند کە ئەو گوتارەی برایەتییەی پێش 107 ساڵ لە کۆنگرەی ئەرزەڕۆمدا پێشکەش کرابوو، تا ئێستاش چاوەڕێی جێبەجێکردن و بوون بە ڕاستییە.
هاتیمۆغۆڵاری لە وتارەکەیدا سەرنجی ڕاکێشایە سەر قەیرانی ئابووری، هەژاری و گەندەڵیی بڵاو لە وڵاتدا و جەختی لەوە کردەوە کە دەبێت ئەم سیستەمە بگۆڕدرێت و هەموو گەلانی نیشتەجێی وڵاتەکە بە زمان و کلتووری خۆیانەوە بە ئازادی بژین.
هەروەها تیشکی خستە سەر پرسی «یاسای چوارچێوە» و پڕۆسەی ئاشتی و پرسیاری ئەوەی کرد: «ئایا بۆ ئازادکردنی سەلاحەدین دەمیرتاش، فیگەن یوکسەکداغ و گەڕانەوەی هاوسەرۆکوانەکان، ئایا پێویست بە بڕیاری ئەنجومەنی ئاسایشی نەتەوەیی دەکات؟ نەخێر. ئەگەر دەسەڵات لە قسەکانیدا ڕاستگۆیە، دەبێت کۆتایی بە زەخت و پەستانەکانی سەر ئازادیی بیروڕا و ڕێکخستنبوون بهێنێت.» ناوبراو هاوکات ئاماژەی بەوەش کرد کە فەلسەفەی «ژن، ژیان، ئازادی» دەبێتە بنەمای سەرەکیی خەباتیان.
لە کۆتایی کۆنگرەکەدا و دوای پێشکەشکردنی وتارەکان، هەریەکە لە حامیەت یڵدرم و موحلیس کرماجی وەک هاوسەرۆکانی نوێی دەم پارتی لە ئەرزەڕۆم هەڵبژێرران.