بەڕێوەبەرایەتیی بەرەنگاربوونەوەی توندوتیژی دژی ئافرەتان و خێزان لە هەولێر، هۆشدارییەکی بەپەلە و توند دەداتە هاووڵاتییان لەبارەی بڵاوبوونەوەی ئەپڵیکەیشنێکی مەترسیداری هاککردن بەناوی "Plus"، کە لە دەرەوەی کۆگا فەرمییەکان بڵاودەکرێتەوە و بۆ مەبەستی سەرانەسەندن و هەڕەشەکردن بەکاردێت.
بەپێی ڕاگەیەنراوی بەڕێوەبەرایەتییەکە، ئەم ئەپڵیکەیشنە لە هیچ کام لە مارکێتە فەرمییەکانی مۆبایلدا (وەک ئەپ ستۆر و پلەی ستۆر) بوونی نییە، بەڵکو تەنیا لە ڕێگەی لینک و نامەی گوماناوی لە تۆڕە کۆمەڵایەتییەکانەوە بۆ خەڵک دەنێردرێت.
میکانیزمی کارکردنی ئەم داوە ئەلیکترۆنییە بەم شێوەیەیە:
دابەزاندنی ئەپەکە: لەگەڵ داگرتن و جێگیرکردنی بەرنامەکە لەسەر مۆبایلەکە، ڕاستەوخۆ دەسەڵاتی چوونەژوورەوە بە هاککەرەکان دەدات.
دزینی داتا: سەرجەم داتا، زانیاری، نامە و وێنە تایبەتییەکانی ناو مۆبایلەکە دەچنە دەست کەسانی هاککەر.
هەڕەشە و سەرانەسەندن: دوای چەند ڕۆژێک لە دزینی زانیارییەکان، هاککەرەکان لە ڕێگەی وێنە و بەڵگە تایبەتییەکانەوە پەیوەندی بە خاوەن مۆبایلەکەوە دەکەن و هەڕەشەی بڵاوکردنەوەی داتاکانی لێدەکەن ئەگەر سەرانەیان پێ نەدات.
: بەڕێوەبەرایەتیی بەرەنگاربوونەوەی توندوتیژی داوا لە سەرجەم هاووڵاتییان دەکات، کە بە هیچ شێوەیەک بەرنامە و ئەپڵیکەیشن لە دەرەوەی کۆگا فەرمییەکان دانەبەزێنن بۆ ئەوەی نەکەونە داوی ئەم جۆرە تەڵە ئەلیکترۆنییانەوە.
هاوژینان و هاوڵاتییان ئاگاداردەکرێنەوە کە لە کاتی ڕووبەڕووبوونەوەی هەر جۆرە هەڕەشەیەکی ئەلیکترۆنی یان سەرانەسەندنێکدا، پێویستە بەبێ ترس و دوودڵی، دەستبەجێ پەیوەندی بە هێڵی گەرمی (119)ی بەڕێوەبەرایەتیی بەرەنگاربوونەوەی توندوتیژییەوە بکەن بۆ وەرگرتنی هاوکاریی یاسایی و تەکنیکی.