وەزارەتی سەرچاوەکانی ئاوی عێراق ڕایگەیاند، بەهۆی لێکتێگەیشتنە هاوبەشەکانەوە بڕی بەردانەوەی ئاوی فۆرات لە سووریاوە بۆ عێراق بەراورد بە ساڵی ڕابردوو چوار هێندە زیاد کردووە و پشکی شایستەی بەنداوی حەدیسەشی گەیاندووەتە نزیکەی پێنج ملیار مەتر سێجا.
خالید شیمال، گوتەبێژی وەزارەتی سەرچاوەکانی ئاوی عێراق، ئاماژەی بەوە دا کە لە ئێستادا بڕی ئاوی هاتوو بۆ عێراق گەیشتووەتە 680 مەتر سێجا لە چرکەیەکدا، لە کاتێکدا ساڵی ڕابردوو لە هەمان کاتدا تەنیا 151 مەتر سێجا بووە، و ئەوەش کاریگەرییەکی گەورەی لەسەر بەرزکردنەوەی ئاستی ئاوی کۆگاكراو لە بەنداوەکان دەبێت.
گوتەبێژی وەزارەتەکە ئەوەشی خستە ڕوو کە لەو بڕە ئاوە زۆرەی ڕووباری فۆرات کە بەرەو عێراق دێت، ڕۆژانە 180 مەتر سێجا لە چرکەیەکدا لە بەنداوی حەدیسە کۆگا دەکرێت؛ لە کاتێکدا توانای گلدانەوەی گشتیی بەنداوەکە 8.2 ملیار مەتر سێجایە، و لە ئێستاشدا بڕی ئاوی کۆگاكراوی ناو بەنداوەکە گەیشتووەتە 4.8 ملیار مەتر سێجا.