دەستەی دەستپاكیی عێراق فەرمانی دەستگیرکردن و بانگهێشتکردنی بۆ 34 کەس لە پارێزگەی ئەنبار دەرکرد، بە تۆمەتی هەوڵدان بۆ دەستبەسەراگرتن و مامەڵەکردنی نایاسایی بە 40 دۆنم زەوی دەوڵەتەوە کە بەهای نزیکەی دوو ملیار دینار بووە.
دەستەی دەستپاكی لە ڕاگەیەندراوێکدا بڵاوی کردەوە کە دوای بەدواداچوون و کۆکردنەوەی زانیاریی وردی هەواڵگری، تیمە تایبەتەکانی دەستپاکی لە پارێزگەی ئەنبار هەڵیانکوتایە سەر فرمانگەی تۆماری خانووبەرە و فەرمانگەی باجی درامەت لە پارێزگاکە و شاری فەلووجە، و دەستیان بەسەر چەندین بەڵگەنامەی ساختەدا گرت.
ئاماژە بەوەشکراوە، باندێکی گەورە لە ناو فەرمانگەکان و دەرەوەیان هەوڵیان داوە دەست بەسەر 40 دۆنم زەوی دەوڵەتدا بگرن و خاوەندارێتییەکەی بۆ ناوی خۆیان بگۆڕن، بەڵام بە زووترین کات هەوڵەکەیان پووچەڵ کرایەوە و شکستپێهێنرا.
بەپێی ڕاگەیەندراوەکەی دەستپاکی، تۆمەتباران بەنیاز بوون ئەو زەوییانە بکەنە 336 پارچەی جیاجیا و بە تۆماری ساختە و بە شێوەیەکی نایاسایی بە خەڵکی بفرۆشنەوە.