هاوسەرۆکی پارتی یەکسانی و دیموکراسیی گەلان (دەم پارتی) ڕایگەیاند، هەنگاوە یاساییەکانی تایبەت بە پرۆسەی چارەسەریی پرسی کورد پێویستی بە بەرپرسیارییەتی و جدییەتی ڕاستەقینە هەیە و داوای کرد یاسای چوارچێوەیی بنەڕەتی بگۆڕدرێت بۆ ستراتیژییەکی گشتگیری کۆمەڵایەتی.
تولای هاتیمئۆغلاری، هاوسەرۆکی دەم پارتی لە کۆنفرانسێکی ڕۆژنامەنووسیدا ڕایگەیاند، لایەنی کوردی سەرجەم ئەرک و بەرپرسیارێتییەکانی خۆی لەم پرۆسەیەدا جێبەجێ کردووە. ئاماژەی بەوەش کرد، مەراسیمی سووتاندنی چەک لە 11ی تەممووزدا هەنگاوێکی ئاسایی نەبووە، بەڵکو لەسەر بنەمای بانگەوازی عەبدوڵا ئۆجالان دەرگایەکی نوێی بۆ ئاشتی کردووەتەوە و لە ئێستاشدا ئەو ئەندامانەی لەو مەراسیمەدا بەشدار بوون، چاوەڕێی هەنگاوی جددی دەکەن بۆ چوونە ناو ئەو قۆناغە نوێیە.
هاوسەرۆکی دەم پارتی جەختی کردەوە، پێویستە هەنگاوە یاساییەکانی پرۆسەی چارەسەری بە شێوەیەکی خێرا و لەم مانگەدا (تەممووزی 2026) جێبەجێ بکرێن. داواشی کرد، پڕۆژەیاسای چوارچێوەیی بە شێوازێکی گشتگیر و بەو جۆرەی پێشتر ڕاوێژ و گفتوگۆی لەسەر کراوە، پێشکەشی پەرلەمان بکرێت بۆ ئەوەی ببێتە بنەمایەکی یاسایی پتەو.
تولای هاتیمئۆغلاری لە بەشێکی دیکەی قسەکانیدا تیشکی خستە سەر بارودۆخی نێودەوڵەتی و ڕایگەیاند، لە کۆبوونەوەی لوتکەی ئەم دواییانەی ناتۆدا بڕیار لەسەر قووڵکردنەوە و بەردەوامیی شەڕ دراوە. گوتیشی: "لەم قۆناغە هەستیارەدا، ئێمە بە شێوەیەکی باشتر لە گرنگیی بەدیهێنانی ئاشتیی ناوخۆیی و گۆڕینی ئەم پرۆسەیە بۆ ستراتیژییەکی جێگیری دەوڵەت تێدەگەین"، ئەمەش وەک پێویستییەک بۆ پاراستنی ناوچەکە لە پەرەسەندنی زیاتری گرژییە سەربازییەکان.
دەم پارتی: هەنگاوە یاساییەکانی پرۆسەی چارەسەری پێویستی بە جدییەت هەیە
