شەپۆلێکی توندی ناڕەزایەتی شارۆچکەی ئەل عەتالەی سەر بە شاری شەدادیە لە پارێزگای حەسەکەی ڕۆژئاوای کوردستان گرتەوە. شێوازی خراپی گوزەران و نەبوونی خزمەتگوزارییە سەرەتاییەکان، خەڵکی ناوچەکەی ناچار کرد بڕژێنە سەر شەقامەکان و گردبوونەوەیەکی ناڕەزایەتی فراوان ئەنجام بدەن.
خۆپێشاندەران و دانیشتووانی ناوچەکە بە توندی سەرکۆنەی بەرزبوونەوەی بێپێشینەی نرخی کەلوپەل و پێداویستییە سەرەکییەکانی ڕۆژانە و تەشەنەسەندنی بێکارییان لە نێو گەنجاندا کرد. هاوكات، ئاماژەیان بە دۆخی خراپی کەرتی تەندروستی، پچڕانی بەردەوامی کارەبا و نەبوونی ئاوی خواردنەوە کرد، کە ژیانی ڕۆژانەی هاووڵاتیانی ئەو دەڤەرەی بە تەواوی پەکخستووە.
خەڵکی ناڕازی لە چوارچێوەی چالاکییەکەیاندا، داوای چاککردنی خێرا لە کەرتی خزمەتگوزاری و دابینکردنی پێداویستییە سەرەتاییەکانی ژیان دەکەن.
خۆپێشاندەران پەنجەی تۆمەتیان بۆ لایەنە ئیدارییەکان درێژ کرد و ڕایانگەیاند، لە کاتێکدا حکومەتی کاتی هاتووەتە ناوچەکە و دەسەڵاتی گرتووەتە دەست، بەڵام ئاستی دابینکردنی خزمەتگوزارییەکان بە شێوەیەکی بەرچاو پاشەکشەی کردووە. جەختیان کردەوە، کە پشتگوێخستنی بەردەوامی ناوچەکەیان لەلایەن ئیدارەی نوێوە، بارگرانی و نەهامەتییەکانی سەر شانی هاووڵاتیانی دووقات کردووەتەوە، بۆیە ئەگەر داواکارییەکانیان جێبەجێ نەکرێت، بەردەوام دەبن لە خۆپێشاندان و مانگرتن.
خەڵکی شارۆچکەی ئەل عەتالە لە پارێزگای حەسەکە دژی نەبوونی خزمەتگوزاری خۆپێشاندانیان ئەنجام دا
