لەگەڵ کۆتاییهاتنی وەرزی دروێنە لە ناوچەی جزیرەی ڕۆژئاوای کوردستان، بەشێک لە جوتیاران بۆ پاککردنەوەی کێڵگەکانیان، پاشماوە کشتوکاڵییەکان دەسووتێنن، بەڵام ئەم کارە دەبێتە هۆی لەناوبردنی زیندەوەران و بەکتریا سوودبەخشەکانی ناو خاک کە بەرپرسن لە پیتاندن و زیادکردنی ماددە سود بەخشەکان، کە ئەمەش بەپیتی زەوی و کوالێتی بەرهەمەکان کەم دەکاتەوە و توانای خاک بۆ پاراستنی شێداری لاواز دەکات.
شارەزایانی کشتوکاڵی لە ڕۆژاڤای کوردستان هۆشداری دەدەن، کە سووتاندن تەنیا کاریگەریی لەسەر خاک نییە، بەڵکو دووکەڵ و گازە ژەهراوییەکانی دەبنە هۆی پیسبوونی هەوا و مەترسیش بۆ سەر تەندروستیی گشتی بەتایبەت بۆ منداڵان و بەساڵاچووان دروست دەکات.
هەروەها بەهۆی بەرزبوونەوەی پلەکانی گەرما و باوە، مەترسیی تەشەنەکردنی ئاگری سووتاندنی کێڵگەکان بۆ ناوچەکانی دیکە هەیە، کە دەبێتە هۆی زیانی ئابووریی گەورە و زیانگەیاندن بە ژینگەی ناوچەکە و سروشت.
شارەزایان جەخت لەسەر ئەوە دەکەنەوە، پاشماوەی کشتوکاڵی بە سامانێکی گرنگ دەبینرێت ئەگەر بە دروستی مامەڵەی لەگەڵ بکرێت و لەبری سووتاندنیان، دەکرێت ئەم پاشماوەیە بۆ ئاژەڵان بەکاربهێنرێت، یان لەگەڵ خاک تێکەڵ بکرێتەوە بۆ ئەوەی ببێتە ماددەی پیتاندنی زەوییەکە.
لە ڕۆژئاوای کوردستان هۆشداری لە سووتاندنی پاشماوەی کشتوکاڵی دەدرێت
