ڕۆژی چوارشەممە، 27ـی ئایاری 2026، ئومێد خۆشناو، پارێزگاری هەولێر لە کۆنفرانسێکی ڕۆژنامەوانیدا ڕایگەیاند، ژمارەی دانیشتووانی پارێزگای هەولێر لەم کاتەدا دوو ملیۆن کەسی تێپەڕاندووە، ئەمەش بەبێ هەژمارکردنی ئاوارە و پەنابەران.
پارێزگاری هەولێر ئاماژەی بەوەش کرد، زیاتر لە 350 هەزار ئاوارە و پەنابەر لە چوارچێوەی سنووری ئیداریی پارێزگاکەدا نیشتەجێن و دەژین.
لە بەشێکی دیکەی لێدوانەکەیدا، ئومێد خۆشناو جەختی لە بەردەوامیی چاودێریی حکوومەت بۆ چین و توێژە پێویستەکان کردەوە، بەتایبەت بەساڵاچووان و منداڵانی بێسەرپەرشت و ڕایگەیاند، لە خانەکانی چاودێریی بەساڵاچووان و منداڵان لە هەولێر، لە نێوان 250 بۆ 300 کەس دەژین و خزمەتگوزاری و چاودێریی بەردەوامیان پێشکێش دەکرێت.
هاوكات ستایشی ئاستی زانستی و خوێندنی ئەو منداڵانەی کرد، لە خانەکانی چاودێریدان و ئاشکرای کرد، ئەو خوێندنگانەی ئەو خوێندکارانە تێیدا دەخوێنن، ساڵانە ڕێژەی دەرچوونیان دەگاتە 100% و نمرەی زۆر بەرز و نایاب لە قۆناغە جیاجیاکانی خوێندندا تۆمار دەکەن.
ئومێد خۆشناو: ژمارەی دانیشتووانی هەولێر دوو ملیۆن کەسی تێپەڕاندووە
