عەلی زەیدی، فەرمانی کردووە هێزە ئەمنییەکانی عێراق لە حاڵەتی ئامادەباشیدابن، ئەوەش کاردانەوەی بەدوای خۆیدا هێناوە و هێزە ئەمنییەکان پابەندبوونیان ڕاگەیاند و بەرپرسە حزبییەکانیش داوای دانبەخۆداگرتن لە لایەنگرانیان دەکەن.
شانەی ئەمنی عێراق ڕایگەیاند، بە ڕێنمایی عەلی زەیدی، فەرماندەی گشتیی هێزە چەکدارەکان، بڕیاردرا ئاستی ئامادەیی ئەمنیی و ئامادەباشیی هێزە ئەمنیی و سەربازییەکان بەرز بکرێتەوە.
هیشام ڕکابی، بەڕێوەبەری نوسینگەی نوری مالیکی، سەرۆکی هاوپەیمانیی دەوڵەتی یاسا، لە نووسینێکدا لە تۆڕى ئێکس دەڵێ، پشتگیریى کۆنترۆڵکردنی چەک لە دەست دەوڵەتدا دەکەن بەگوێرەی یاسا و دەستوور، بەڵام بە شێوەیەک کە ئاشتیی ناوخۆیی بپارێزێت و عێراق لە هەر ڕووبەڕووبوونەوەیەکی ناوخۆیی یان خوێنڕشتن دوور بخاتەوە.
هادی عامری، ئەمینداری گشتیی رێکخراوی بەدریش لە بانگەوازێکدا داوای لە گرووپی موقاوەمەی ئیسلامی لە عێراق کرد، کاردانەوەکانیان بەرانبەر بە هێرشەکانی ئەمریکا و سعودیە دوابخەن و بەڵێنیان دەداتێ، لە ڕێگەی دیپلۆماسییەوە بەدواداچوون بۆ مافی شەهید و بریندارەکانی ئەو هێرشانە دەکات.
هادی عامری دەڵێت: "بانگەوازەکەم ئاڕاستەی کوڕان و برایانم دەکەم لە بەرگریی ئیسلامی لە عێراق، ئەو موجاهیدە پاڵەوانانە، بانگەواز دەکەم بە دواخستنی هەر پەرچەکردارێک دژی دەسترێژیی ئەمریکی-سعودی، کە عێراقی کردووەتە ئامانج و دان بە خۆتاندا بگرن و خۆراگربن لەپێناو بەرژەوەندییە باڵاکانی عێراق، بەڵێن بە هەموو موجاهیدەکان دەدەین، مافی شەهیدان و بریندارەکان لەڕێگە دیپلۆماسییەکانەوە بەدواداچوونی بۆ دەکەین، ئیشەڵا هەموو ئەمانە بەدی دەهێنین، سوپاس بۆ ئێوە ئەی برایانی پاڵەوان".
نوری مالیکی پشتگیرى کۆنترۆڵکردنی چەک لە دەستی دەوڵەتدا دەکەین
