هاوسەرۆکی کۆنگرەی نەتەوەیی کوردستان (کەنەکە) ڕایگەیاند، پێویستە هێزە کوردییەکان لەم قۆناغە هەستیارەدا بەرژەوەندییە حزبییەکانیان وەلابنێن و هەنگاوی ڕاستەقینە بەرەو یەکڕیزی بنێن.
زەینەب موراد هاوسەرۆکی کۆنگرەی نەتەوەیی کوردستان، لەبارەی بەربەست و دەرفەتەکانی بەردەم یەکێتیی نەتەوەیی ڕایگەیاند، پێویستە هەموو لایەنەکان بەرژەوەندییە سیاسییەکانی خۆیان بخەنە لاوە و بەگوێرەی بەرژەوەندییەکانی گەلی کورد هزرێکی نەتەوەیی دابمەزرێنن.
زەینەب موراد ئاماژەی بەوەش کرد: "پێشتر گوشارەکانی هێزە هەرێمییەکان ڕێگر بووە لە بەردەم سازدانی یەکێتیی نەتەوەیی کورد، بەڵام لە ئێستادا ناوچەکە ڕووبەڕووی گۆڕانکاریی گەورە بووەتەوە و دەوڵەتان خاوەن هەمان هێزی پێشووی خۆیان نین، بەڵکو تەنیا بەدوای ئەوەوەن پێگەی هەنووکەیی خۆیان بپارێزن".
هاوسەرۆکی کەنەکە تیشکی خستە سەر گۆڕانی هاوکێشەکان و پێگەی نوێی کورد و گوتی: "گەلی کورد هەمان گەلی ڕابردوو نییە و ئیتر یەکێکە لە ئەکتەرە گرنگەکانی ناوچەکە، لەڕووی هێز و دیپلۆماسییەتەوە پێگەیەکی گرنگی هەیە و خاوەن هێزی ژنان و گەنجانە".
زەینەب موراد جەختی کردەوە، گەر ئەم هێزانە یەکبگرن، ئەوا لەم قۆناغە نوێیەدا دەتوانرێت بە تەواوی یەکێتیی نەتەوەیی کورد پێکبهێنرێت.
کەنەکە: یەکێتیی نەتەوەیی پێویستی بە هەنگاوی کردەیییە
