کەماڵ کڵچدارئۆغڵو، سەرۆکی پارتی گەلی کۆماری (جەهەپە) هۆشداریی توند دەدات لە دروستبوونی ناوچەگەری و باڵباڵێن لە نێو پارتەکەیدا و ڕایدەگەیەنێت، کە دابەشبوونی جەهەپە بەسەر دوو بەرەدا و دامەزراندنی قەوارەیەکی نوێ، ڕاستەوخۆ لە خزمەت و بەرژەوەندیی ڕەجەب تەیب ئەردۆغاندا دەبێت.
هاوکات کەیسی زیندانیکردنی سەلاحەدین دەمیرتاش بە بڕیارێکی سیاسی ناوزەد دەکات.
سەبارەت بەو ئاڵۆزییە ناوخۆییانەی کە بەرۆکی گەورەترین پارتی ئۆپۆزسیۆنی تورکیایان گرتووە و دەنگۆی دوورخستنەوەی سەرۆک شارەوانیی پێشووی ئستەنبوڵ، کڵچدارئۆغڵو ڕایگەیاند: "هیچ بڕیارێک یان پلانێکمان بۆ دەرکردنی ئەکرەم ئیمامئۆغڵۆ لە ئارادا نییە. ئێمە چاوەڕێی یەکلاییکردنەوەی بڕیاری کۆتایی دادگا دەکەین لەسەر دۆسیەکەی".
جەختیشی کردەوە، سەرکردایەتیی پارتەکە بە هیچ شێوەیەک ڕێگە نادات درز و دووبەرەکی لە نێوان ڕیزەکانی جەهەپەدا دروست ببێت و پێگەی پارتەکە لاواز بکات.
سەرۆکی جەهەپە ئاوڕی لە دۆسیەی هاوسەرۆکی پێشووتری پارتی دیموکراتی گەلان (هەدەپە) دایەوە و ئاماژەی بەوە کرد، بڕیاری زیندانیکردنی سەلاحەدین دەمیرتاش هیچ بنەمایەکی یاسایی نییە، بەڵکو تەنیا فشارێکی سیاسییە. کڵچدارئۆغڵو گوتی: "حکومەت مافی خۆیەتی دادگایی بکات، بەڵام ڕاگرتن و هێشتنەوەی ناوبراو لە پشت شیشەکانی زینداندا نادادپەروەرییەکی ڕوونە".
ئەم لێدوانانە لە کاتێکدا دێن، لە 21ی گوڵانی ڕابردوودا، دادگای تێهەڵچوونەوەی ئەنقەرە بڕیاری پوچەڵکردنەوەی ڕەهای بۆ بڕیارەکانی کۆنگرەی 38ەمینی جەهەپە ڕەتکردەوە.
کەمال کڵچدارئۆغڵو: زیندانیکردنی دەمیرتاش سیاسییە نەک یاسایی
