وەزارەتی ناوخۆی عێراق ڕایگەیاند، پڕۆسەی تۆمارکردنی هاووڵاتیان لە پڕۆژەی کارتی نیشتمانی گەیشتووەتە قۆناغی کۆتایی و تا ئێستا زیاتر لە 48 ملیۆن کەس تۆمار کراون.
ئەمڕۆ دووشەممە، وەزارەتی ناوخۆی عێراق ئاشکرای کرد، نزیکەی 98%ی پڕۆسەی تۆمارکردنی هاووڵاتییانی عێراق لە پڕۆژەی کارتی نیشتمانی تەواو کراوە و ژمارەی گشتیی ئەو هاووڵاتیانەی تا ئێستا ناویان تۆمار کراوە گەیشتووەتە 48,266,503 هاووڵاتی.
لیوا میقداد میری، سەرۆکی فەرمانگەی پەیوەندییەکان و ڕاگەیاندن لە وەزارەتی ناوخۆ، لەبارەی بەرەوپێشچوونی پڕۆژەکە ڕایگەیاند: "وەزارەتی ناوخۆ پێشکەوتنێکی باشی لە پڕۆژەی کارتی نیشتمانی بەدەست هێناوە، ئەم دەستکەوتەش لە چوارچێوەی پلانی وەزارەتدایە بۆ فەراهەم کردنی خزمەتگوزاری دیجیتاڵی لە ڕێکارە کارگێڕییەکاندا".
سەرۆکی فەرمانگەی پەیوەندییەکان و ڕاگەیاندن گوتیشی: "تەواوبوونی ئەم پڕۆسەیە یارمەتیدەرێکی باش دەبێت لە بەهێزکردنی سیستەمی ئەمنی و پێشکەشکردنی باشترین خزمەتگوزاری بە هاووڵاتییان لە هەموو پارێزگاکانی عێراقدا".
لیوا میقداد میری جەختی لەوە کردەوە، ئەم هەنگاوە بەشێکە لە ستراتیژیەتی حکومەت بۆ کەمکردنەوەی ڕۆتین. گوتیشی: "کار دەکەین بۆ ئەوەی سیستەمی کارگێڕی بە تەواوی بکرێتە ئەلیکترۆنی و هاووڵاتییان بە ئاسانی دەستیان بە خزمەتگوزارییەکان بگات".
پڕۆژەی کارتی نیشتمانی یەکێکە لە گەورەترین پڕۆژە نیشتمانییەکانی حکومەتی عێراق، کە ئامانج لێی یەکخستنی ناسنامەی هاووڵاتیان و دروستکردنی بنکەیەکی زانیاریی ورد و پێشکەوتووە بۆ هەموو دانیشتووانی عێراق.
وەزارەتی ناوخۆ: 98%ی هاووڵاتییانی عێراق کارتی نیشتمانییان بۆ کراوە
