دەزگای دژەتیرۆری عێراق لە ڕاگەیەندراوێکی فەرمیدا دانی بەوەدا نا کە لە ئۆپراسیۆنەکەی ئەیلوولی کەرکووکدا، دوو گەنجی کورد لەلایەن هێزەکانیانەوە بە هەڵە شەهید کراون و لیژنەی لێکۆڵینەوەش پێکهێنراوە.
ئەمڕۆ دەزگای دژەتیرۆری عێراق ڕاگەیەندراوێکی فەرمیی دەربارەی ڕووداوەکەی ناوچەی پردێ بڵاوکردەوە و تێیدا ڕایگەیاند، ئۆپراسیۆنەکە لە چوارچێوەی ئەرکی نیشتمانی بووە بۆ بەرەنگاربوونەوەی تیرۆریستان و پووچەڵکردنەوەی پلانەکانیان، بەڵام لە ناوچەیەکی نیشتەجێبوونی چڕدا و لەکاتی ڕاوەدوونانی دوو تیرۆریستدا (کە یەکێکیان پشتێنی بۆمبڕێکراوی پێوەبووە و ئەوی دیکەشیان چەکدار بووە)، ڕووبەڕووبوونەوە ڕوویداوە.
بەپێی ڕاگەیەندراوەکە، لەکاتی ڕووبەڕووبوونەوەکەدا بۆ ڕێگری لە تیرۆریستەکان، تیرۆریستێک کوژراوە و یەکێکی دیکەیان دەستگیر کراوە، بەڵام لەم نێوەندەدا دوو هاووڵاتیی مەدەنی بە هەڵە شەهید بوون و چوار ئەندامی دەزگای دژەتیرۆریش بریندار بوون.
دەزگای دژەتیرۆر ئاماژەی بەوەش کردووە کە ڕاستەوخۆ لەسەر فەرمانی فەرماندەی گشتیی هێزە چەکدارەکان، لیژنەیەکی هاوبەشی لێکۆڵینەوە بۆ بەدواداچوون و لێکۆڵینەوە لە ڕاستییەکان پێکهێنراوە. هاوکات دەزگا سەرەخۆشی و دڵگرانیی قووڵی خۆی ئاراستەی بنەماڵە و کەسوکاری ئەو دوو گەنجە کوردەی پردێ کردووە.
ڕۆژی یەکشەممە 27ی ئەیلول، هێزەکانی دژە تیرۆری عێراق لە ڕووبەڕووبوونەوەی دوو چەکداری داعشدا لە شارۆچکەی پردێ دوو گەنجی کورد بەهەڵە شەهید کران و و بەڵام دژە تیرۆر ئەو کات ڕایگەیاند یەکێک لەو گەنجانە بە ناوی محەمەد هێمن چەکداری داعش بووە وێنەکەیان بڵاوکردەوە و دوای دوو ڕۆژ بە خانەوادەکەیان ڕاگەیاند.
ناساندنی ئەو گەنجە کوردە بە داعش ناڕەزایەتی گەورەی بنەماڵە و کوردانی پردێ لێکەوتەوە و خۆپیشاندانیان ئەنجامدا و لەژیر فشارەکاندا دەرکەوت کە بەهەڵە ئەو گەنجە کوردە کوژراوە نەک ئەوەی چەکداری داعش بێت.