شارەزایانی سەربە نەتەوە یەکگرتووەکان ئەمڕۆ پێنجشەممە (٦ی ئابی ٢٠٢٦) داوایان لە دەسەڵاتدارانی ئێران کرد کۆتایی بە پەرەسەندنی دەستبەسەرکردنی هەڕەمەکی، ڕفاندن، بێسەروشوێنکردن، ئەشکەنجەدان و لەسێدارەدانی نادادپەروەرانەی پێکهاتە نەتەوەییەکان، بەتایبەت کورد و بلووچ، بهێنن و ڕایگەیاند کە پێکهاتەکانی ئێران دەبێت بە بێ جیاکاری لە ئارامی و کەرامەتدا بژین.
بەگوێرەی راگەیەندراوەکەی شارەزایان، لە سەرەتای خۆپیشاندانەکانی کانوونی یەکەمی ٢٠٢٥ـەوە دەسەڵاتدارانی ئێران هەزاران کەسیان دەستبەسەر کردووە و زۆرینەیان لە ژێر ئەشکەنجەدا ناچار بە دانپێدانانی زۆرەملێ کراون.
شارەزایان ئاماژەیان بەوە داوە که تەنها لە ساڵی ٢٠٢٦ـدا لانیکەم ٢٤ هاووڵاتیی بلووچ و ٢٢ هاووڵاتیی کورد لەسێدارە دراون و ژمارەیەکی زۆری تریش لە مەترسیی لەسێدارەداندا دەن.
شارەزایانی نەتەوە یەکگرتووەکان هێمایان بۆ ئەوە کردووە کە یاساکانی پەیوەندیدار بە فراوانکردنەکەی ساڵی ٢٠٢٥ بۆ پێناسەی سیخوڕی و تۆمەتەکانی وەک "محاربە" و "فساد فی الأرض" بە شێوەیەکی فراوان دژی پێکهاتەکان بە کار دەهێنرێن
. ئەوان داوایەکی بەپەلەیان لە بەرژەوەندیی پێنج کەس بە ناوەکانی یوسف ئەحمەدی، ڕەئوف شێخ مەرووفی، محەممەد فەرەجی، محسن ئیسلامخاهـ و فەرهاد بەرانزەهی کرد کە مەترسیی لەسێدارەدانیان لەسەرە.
لە بەشێکی تری ڕاگەیەندراوەکەدا هاتووە کە ئامانجگرتنی کورد و بلووچ سنووری ناوخۆی وڵاتی تێپەڕاندووە و کەمپیینەکانی هەڕەشە و چاودێریکردن دژی چالاکوانانی دەرەوەی وڵاتیش بە ڕێوە دەچن، بە جۆرێک دەسەڵاتدارانی ئێران دەستیان بەسەر موڵک و ماڵی سەدان کەس لە هاووڵاتییانی دەرەوەدا گرتووە و لیستی ناوی ٣٧ سەکردە و چالاکوانی کوردیان لە دەرەوە بڵاو کردووەتەوە کە سزای غیابی و داوای ڕادستکردنەوەیان بۆ دەرچووە.