وەزارەتی دەرەوەی ئێران ڕایگەیاند، ڕۆژی دووشەممە فەرماندەی سوپای پاکستان سەردانی تاران دەکات بۆ گەیاندنی پەیامی واشنتن و دەستپێکردنەوەی گفتوگۆکان.
بەگوێرەی ڕاگەیەندراوی وەزارەتی دەرەوەی ئێران، ڕۆژی دووشەممە عاسم مونیر، فەرماندەی سوپای پاکستان بە سەرۆکایەتی شاندێکی باڵا دەگاتە تاران. سەردانەکە بە مەبەستی گەیاندنی نامە و پەیامی نوێی ئیدارەی واشنتنە بە بەرپرسانی باڵای ئێران، لەپێناو دەستپێکردنەوەی دانوستانەکان و ڕێگریکردن لە ئاڵۆزبوونی زیاتری دۆخی ڕۆژهەڵاتی ناوەڕاست.
تاران ئاماژەی بەوەش کردووە، بەرپێشوازی ئەم سەردانە، ڕۆژی شەممە عەباس عێراقچی وەزیری دەرەوەی ئێران پەیوەندییەکی تەلەفۆنی لەگەڵ عاسم مونیر ئەنجامداوە و پێشهاتەکانی ناوچەکەیان تاوتوێ کردووە.
ئەم هەوڵەی نێوەندگیریی پاکستان دوای ئەوە دێت کە گفتوگۆکانی نێوان واشنتن و تاران بە تەواوەتی ڕاوەستابوون و ئاڵوگۆڕی لێدوانی توند و هەڕەشەی بەردەوام لە نێوان هەردوولادا سەریهەڵدابوو.