ئەمڕۆ چوارشەممە ٩ی ئەیلوولی ٢٠٢٦، لە مەکتەبی سیاسیی یەکێتیی نیشتمانیی کوردستان لە سلێمانی، کۆبوونەوەی لووتکەی ئەنجوومەنی باڵای جووڵانەوەی نەوەی نوێ و مەکتەبی سیاسیی یەکێتی بەڕێوەچوو و تێیدا دۆخی هەرێمی کوردستان و پرسی پێکهێنانی کابینەی نوێی حکومەت تاوتوێ کرا.
لە کۆبوونەوەکەدا هەردوو لایەن ئامادەیی خۆیان دەربڕی بۆ پێکهێنانی کابینەی نوێی حکومەت لەسەر بنەمای ئیستحقاقی هەڵبژاردن، بە جۆرێک کە حکومەتێکی هاوسەنگ و پەسەندکراو بێت لەلایەن خەڵکی هەرێمی کوردستان، عێراق و کۆمەڵگەی نێودەوڵەتییەوە و چارەسەری بنەڕەتی بۆ کێشەکانی نێوان هەولێر و بەغدا پێبێت.
لە ڕاگەیەندراوی کۆبوونەوەکەدا هاتووە کە پێکنەهێنانی حکومەت پەیوەستە بە ژیان و گوزەرانی خەڵکەوە، و هەر لایەنێک ببێتە هۆکاری بەربەست لەم پرۆسەیەدا، بەرپرسیار دەبێت بەرامبەر بە خەڵکی هەرێمی کوردستان و دەرئەنجامەکانی داهاتوو.
هەروەها جەخت کرایەوە که بۆ کۆتاییهێنان بە دۆخی ئێستا و بەدیهێنانی خۆشگوزەرانی، هەموو ڕێگەیەکی چارەسەر دەگیرێتە بەر و دەرگای گفتوگۆی ئەم هاوپەیمانێتییەش لەسەر بنەمای واقیعە نوێیەکە بەڕووی هەموو لایەکدا کراوەیە.