مەزڵوم عەبدی، فەرماندەی گشتیی هێزەکانی سووریای دیموکرات (هەسەدە) لەگەڵ نوورەدین ئەحمەد، پارێزگاری حەسەکە کۆبووەوە؛ لە کۆبوونەوەکەدا تاوتوێی ڕێگەکانی چارەسەرکردنی قەیرانی کەمبوونی سووتەمەنی و بەرزبوونەوەی نرخەکانیان لە پارێزگاکەدا کرد.
بەگوێرەی زانیارییەکانی نووچە تیڤی جەنەراڵ مەزڵوم عەبدی و ئەندازیار نوورەدین ئەحمەد، پارێزگاری حەسەکە، لە کۆبوونەوەکەیاندا بە قووڵی تیشکیان خستە سەر ئەو قەیرانە گەورەی بەهۆی کەمبوونی سووتەمەنی و بەرزبوونەوەی نرخەکانی لە تەواوی پارێزگاکەدا دروستبووە، کە بارگرانییەکی زۆری بۆ سەر شانی هاوڵاتییان دروستکردووە.
هەردوولا گەیشتنە ڕێککەوتن بۆ دامەزراندنی میکانیزمێکی تایبەت و فریاگوزاری بە مەبەستی پاڵپشتیکردنی سێکتەری خزمەتگوزارییەکانی سووتەمەنی لە حەسەکە.
ئەم هەنگاوە ئامانج لێی دابینکردنی پێداویستییەکانی ناوچەکەیە بە شێوازێک کە ڕاستەوخۆ هاوکار بێت لە باشترکردنی دۆخی گوزەران و ژیانی ڕۆژانەی دانیشتووانی پارێزگاکە.
