دەستەی گشتیی مامۆستایان و فەرمانبەرانی گرێبەست لە هەرێمی کوردستان سەردانی ئەنجومەنی نوێنەرانی عێراقیان کرد و لەگەڵ فراکسیۆنە کوردستانییەکان کۆبوونەوە؛ ئامانجی سەردانەکەش جێگیرکردنی شایستە و مافەکانیان بوو لە پڕۆژەیاسای بودجەی گشتیی عێراقدا.
بەپێی ڕاگەیەندراوێکی دەستەکە، نوێنەرانی مامۆستایان و فەرمانبەرانی گرێبەست ڕۆژی سێشەممە ٢١ی تەممووزی ٢٠٢٦، کۆبوونەوەیان لەگەڵ فراکسیۆنەکانی (پارتی، یەکێتی، نەوەی نوێ، یەکگرتووی ئیسلامی و ڕەوتی هەڵوێست) ئەنجامداوە.
لە کۆبوونەوەکەدا، نوێنەران نووسراوی فەرمیان ئاڕاستەی فراکسیۆنەکان کردووە بە مەبەستی جێگیرکردنی شایستە داراییەکانیان لە بودجەی گشتیی عێراقدا، جەختیشیان لەوە کردووەتەوە کە لە هەوڵەکانیان بەردەوام دەبن و لە ئایندەیەکی نزیکدا کۆبوونەوەی زیاتر ئەنجام دەدەن تاوەکو سەرجەم مامۆستایان و فەرمانبەرانی گرێبەست بە شێوەی هەمیشەیی دادەمەزرێن.