دڵشاد شەهاب، وتەبێژی سەرۆکایەتیی هەرێمی کوردستان، لە کۆنفرانسێکی ڕۆژنامەوانیدا ڕایگەیاند، پێشمەرگە کاریگەرترین هێز بوو بۆ تێکشکاندنی داعش و بەرگریی لە سەرجەم پێکهاتەکانی عێراق کردووە، جەختیشی لەوە کردەوە کە لەمڕۆوە هەرێمی کوردستان بووە خاوەنی سوپایەکی یەکگرتوو.
دڵشاد شەهاب ئاماژەی بەوە دا، ئەگەر پێشتر هێزی پێشمەرگە لە شێوە و کرداریشدا یەکانگیر نەبووبێت، بەڵام لە زەین و بیر و باوەڕدا هەمیشە بۆ پاراستنی کوردستان بێ جیاوازی تێکۆشاون و ئەرکی هەمووانە پێشمەرگە بە هێزی بەرگریکاری خۆیان بزانن. هەروەها ڕایگەیاند کە لەمەودوا پێشمەرگە موڵکی هیچ کەسێک نییە و هەمیشە خاڵی هاوبەشی یەکێتی و پارتی بووە.
وتەبێژی سەرۆکایەتیی هەرێم جەختی لەوەش کردەوە کە یەکخستنەوەی پێشمەرگە پێگەی هەرێمی کوردستان بەهێزتر دەکات و لە ئێستادا هاوئاهەنگیی باش لە نێوان پێشمەرگە و سوپای عێراقدا بوونی هەیە.