کۆمیتەی ئاوارەکانی سەرێکانی، ڕایگەیاند هەفتەی داهاتوو سێیەم کاروانی ئاوارەکانی سەرێکانی لەچوارچێوەی ڕێککەوتنی 29ی کانوونی دووەم دەگەڕێنەوە زێدی خۆیان.
ئەندامیکی کۆمیتەکە بە نووچەتیڤی گوت، هێشتا ژمارەی ئەو خێزانانەی دەگەڕێنەوە و ڕۆژی گەڕانەوەیان دیارینەکراوە، بەڵام هەفتەی داهاتوو سێیەم کاروان بەرە و سەرێکانی بەڕێدەکەوێت.
کاروانی دووەمی ئاوارەکانی سەرێکانی کە لە 681 خێزان پێکهاتبوون لە 8ی ئەیلول گەڕانەوە زێدی خۆیان و چاوەڕواندەکرێت سەرجەم ئاوارەکانی کامپەکانی واشوکانی، نەورۆز و سەرێکانی قۆناغ بە قۆناغ بگەڕێنەوە زێدی خۆیان.
بۆ تاوتوێکردنی دۆخی ئاوارەکانی سەرێکانی و گەڕانەوەیان بۆ شارەکە و هاوکارییەکانیان دۆینێ شاندێکی کۆمیتەی ئاوارەکانی سەرێکانی، دوای گەڕانەوەی ئاوارەکان بۆ زێدی خۆیان لەگەڵ سبەستییان ئۆچێ، نوێنەری خاچی سوور کۆبووەوە.