ئەمریکا گەشتکردنی فەرمانبەرانی لە سعودیە بەهۆی تێکچوونی دۆخی ئەمنییەوە سنووردار کرد

وەزارەتی دەرەوەی ئەمریکا ڕایگەیاند، گەشتکردنی فەرمانبەرانی حکومەتی ئەمریکای لە ناو خاکی سعودیە بۆ هەردوو شاری تائیف و یەنبەع سنووردار کردووە.

ئەم هەنگاوەی واشنتن لە ئەنجامی تێکچوونی دۆخی ئەمنیی ناوچەکە و بەردەوامیی هێرشەکانی حووسییەکانی یەمەن بۆ سەر دیارترین دامەزراوە و ناوچەکانی ئەو شانشینە هاتووە.

وەزارەتی دەرەوەی ئەمریکا لە هەژماری فەرمیی خۆی لە تۆڕی کۆمەڵایەتیی ئێکس ئاماژەی بەوە کردووە کە بەهۆی بەردەوامیی ناڕوونی و مەترسییە ئەمنییەکان لە سعودیە، لەمەودوا ئەو فەرمانبەرانەی حکومەتی ئەمریکا کە لە ناو خاکی سعودیە کار دەکەن، بۆ ئازادیی سەرجەم گەشتە فەرمی و کەسییەکانیان بەرەو شارەکانی تائیف و یەنبەع، پێویستیان بە وەرگرتنی مۆڵەتی تایبەت دەبێت.