گەنجێکی کوردی خەڵکی ئامەد بەناوی (فورکان ئۆغڵاک) کە بۆ کارکردن ڕووی لە شاری کاستامۆنۆی کردبوو، لەسەر سکاڵای چەند کەسێک بەهۆی گوێگرتن لە گۆرانیی کوردی دەستبەسەر کرا و بڕیاری بەندکردنی بۆ دەرچوو.
بیلال ئۆغڵاک، باوکی فورکان ڕایگەیاند، کوڕەکەی لە 11ی تەمووزدا بۆ کارکردن لە کەرتی بیناسازی چووەتە ئەو شارە و ڕۆژی دواتر (12ی تەمووز) لەسەر گوێگرتن لە گۆرانیی کوردی دەستگیر کراوە.
باوکی ئەو گەنجە ئاماژەی بەوەش کردووە، دوای دەستبەسەرکردنی کوڕەکەی، هێزە ئەمنییەکان پشکنینیان بۆ هەژمارەکانی لە تۆڕە کۆمەڵایەتییەکان کردووە و پۆستەکانی سەبارەت بە سەلاحەدین دەمیرتاش، یەڵماز گۆنای و پرۆسەی ئاشتییان وەک بنەما بۆ دروستکردنی تۆمەت لە دژی بەکارهێناوە.