گوڵستان فەرهان، ئەندامی بەڕێوەبەرایەتیی هێزەکانی ئاسایشی ناوخۆ لە ڕۆژاڤای کوردستان ڕایگەیاند، بوونی ژنان لە بواری ئەمنیدا بەشێکی سەرەکییە لە گۆڕانکاریی کۆمەڵایەتی و جەختیشی کردەوە کە ژنان دەستبەرداری دەستکەوتەکانیان نابن.
گوڵستان فەرهان لە لێدوانێکدا بۆ میدیاکان ئاماژەی بەوە کرد، لە سەرەتای بەشدارییکردنی ژنان لە هێزەکانی ئاسایشی ناوخۆدا هەندێک کۆسپ و تەگەرە هەبوون، بەڵام بەهۆی بەردەوامیی خولەکانی پێگەیاندن و ڕاهێنانەوە، ئێستا ژنان ڕۆڵێکی سەرەکی و یەکلاکەرەوە لە پاراستنی ئارامی و سەقامگیریی کۆمەڵگەدا دەگێڕن.
ئەو ئەندامەی بەڕێوەبەرایەتیی هێزەکانی ئاسایش گوتی: "کۆمەڵگە بەبێ ژن بنیاد نانرێت.
هەرچەندە تاوەکو ئێستاش هەندێک لایەن و عەقڵییەت دژی ئەوەن ژنان لە بواری سەربازی و ئەمنیدا کار بکەن یان چەک هەڵبگرن، بەڵام ژنان لەگەڵ پیاوان شانبەشانی یەکتر کار دەکەن بۆ پاراستنی وڵات."
گوڵستان فەرهان باسی لەوەش کرد کە شۆڕشی ڕۆژاڤای بە شۆڕشی ژنان دەناسرێتەوە و لە ماوەی 15 ساڵی ڕابردوودا، سەرڕای هەموو هێرش، فشار و عەقڵییەتە باوەکانی کۆمەڵگە، ژنان لە بواری سەربازی، سیستمی هاوسەرۆکایەتی و هەموو کایەکانی ژیاندا سەرکەوتنی گەورەیان بەدەستهێناوە و لە مێژووی سوریادا شوێندەستیان دیارە.