گوتەبێژی سەرۆکوەزیرانی عێراق ڕایگەیاند، مامەڵەکردنی حکومەت لەگەڵ سەرجەم گروپە چەکدارەکان لەسەر بنەمای یاسایی و نیشتمانی دەبێت و دوور دەبێت لە زمانی زبر و هەڕەشە.
ئاماژە بەوەش دەکات کە هیچ وادەیەک بۆ ڕادەستکردنی چەکەکانیان دیاری نەکراوە.
سەباح نوعمان، گوتەبێژی سەرۆکوەزیرانی عێراق ڕایگەیاند: "دەستەی حەشدی شەعبی وەک دامەزراوەیەکی فەرمیی دەوڵەت دەمێنێتەوە، بەڵام بە شێوەیەکی ڕاستەوخۆ و هاوشێوەی سەرجەم هێزە ئەمنییەکانی دیکە، لە ڕێگەی وەزارەتەکانی بەرگری و ناوخۆوە دەخرێتە ژێر ڕکێف و فەرمانی فەرماندەی گشتیی هێزە چەکدارەکانی عێراق."
گوتەبێژی سەرۆکوەزیرانی عێراق باسی لەوەش کردووە، ئەم هەنگاوە وا دەکات پەیوەندیی ئەو گروپە چەکدارانە لەگەڵ لایەنە سیاسییەکاندا کۆتایی بێت و هەمووان لەژێر چەترێکدا خاوەنی یەک بڕیاری ئەمنی و سەربازیی بن لە وڵاتدا.