ئەمڕۆ پەرلەمانی عێراق دانیشتنە ئاساییەکانی خۆی دەستپێدەکاتەوە و بەپێی کارنامەی فەرمیی ڕاگەیەندراویش، بڕیارە خوێندنەوەی یەکەم بۆ چوار پڕۆژەیاسا و پێشنیازەیاسای گرنگ و جیاواز لە سێکتەرە ئەمنی، کۆمەڵایەتی و یاساییەکاندا بکرێت.
بەگوێرەی ڕاگەیەندراوی پەرلەمان، دانیشتنەکە کاتژمێر 1:00ـی دوانیوەڕۆی ئەمڕۆ دەستپێدەکات و تەوەری سەرەکیی کۆبوونەوەکەش بەم شێوەیەی خوارەوە دەبێت:
کارنامەی دانیشتنەکەی پەرلەمان
بڕگەی یەکەم - یاسای تاوانە ئەلیکترۆنییەکان: ئەنجامدانی خوێندنەوەی یەکەم بۆ پڕۆژەیاسای "تاوانەکانی تەکنۆلۆژیای زانیاری" بە مەبەستی ڕێکخستنی یاسایی و سزادانی تاوانە ئەلیکترۆنییەکان.
بڕگەی دووەم - چاودێریکردنی نەوجەوانان: خوێندنەوەی یەکەم بۆ پڕۆژەیاسای هەموارکردنی یەکەمی یاسای چاودێریکردنی نەوجەوانان (ژمارە 52ـی ساڵی 1980).
بڕگەی سێیەم - هەموارکردنی یاسای پارێزەرایەتی: خوێندنەوەی یەکەم بۆ پڕۆژەیاسای هەموارکردنی یاسای "پارێزەرایەتی" (ژمارە 173ـی ساڵی 1965).
بڕگەی چوارەم - بەهێزکردنی بەرگریی ئاسمانی: خوێندنەوەی یەکەم بۆ پێشنیازی یاسای دابینکردنی دارایی پێویست بۆ بەهێزکردن و پەرەپێدانی سیستمەکانی بەرگریی ئاسمانیی عێراق.