وەزارەتی خەزێنەی ئەمریکا ڕۆژی پێنجشەممە ڕایگەیاند کە کۆمەڵێک کەسایەتی و کۆمپانیای لە عێراق، ئیمارات و لوبنان خستووەتە لیستی سزاکانەوە بە تۆمەتی پێشکەشکردنی پشتگیریی دارایی، چەک و لۆجستیکی بە گرووپی کەتائبی حیزبوڵڵای عێراق.
بەپێی ڕاگەیەندراوی وەزارەتەکە، کەتائبی حیزبوڵڵا لەلایەن فەیلەقی قودسی سوپای پاسدارانەوە پشتگیریی دارایی، سەربازی، ڕاهێنان و زانیاری وەردەگرێت.
هاوکات لە چوارچێوەی ئەم سزایانەدا، چوار فەرماندە و چەندین کەسایەتی و کۆمپانیای عێراقی و ئیماراتی بە تۆمەتی دابینکردنی کەرەستەی سەربازی و گواستنەوەی پارە سزا دراون، و یەکێک لە کۆمپانیاکانی ئاڵوگۆڕی دراو لە دوبەی ملیۆنان دۆلاری لە عێراقەوە بۆ ئێران گواستووەتەوە.