Li daristan û mêrgên Zagrosê şewateke berfireh derket.
Krîza ku şeva 20'ê hezîranê dest pê kir, tevî şandina tîmên agirkûjî û helîkopteran, li hinek deveran heta duh berdewam kir.
Xeta agir li hinek deveran bi dehan kîlometreyan berfireh bûye.
Kontrolkirina agir zêdetir li ser milê dilxwazên herêmî maye.
Şewata ku li mêrg û daristanên berûyê yên herêma Bekek a ser bi navçeya Jarah û Baladehê ve dest pê kir, ji ber bayê tund, hişkbûna giyayan û zehmetiya gihîştina herêmên çiyayî, zû belav bû.
Lêkoler û çalakvana jîngehê Ezam Behramî li ser vê mijarê ji ajansa Nûjinhayê re got:
"Şewatên Zagrosê êdî ne bûyerên kêmwext in.
Ev herêm veguheriye yek ji navendên agir ên mayînde û dubare li Rojhilata Navîn.
Zagrosa ku ji sedî zêdeyî 40'î daristanên Îranê dihewîne, ji bo parastina çavkaniyên avê, xak, cihêrengiya jiyanî û debara jiyana bi milyonan mirovan li rojava û başûr-rojavayê welêt, xwedî girîngiyeke jiyanî ye.
