Serokkomarê Îranê Mesûd Pizişkiyan, ji bo pêşkêşkirina gotara fermî ya welatê xwe û encamdana çendîn hevdîtinên dîplomatîk, bi şandeke bilind re gihîşt Dewletên Yekbûyî yên Amerîkayê. Ev serdan di demekê de pêk tê ku peywendiyên navbera Washington û Tehranê di asteke gelekî aloz de ne.
Beriya ku ji Tehranê bi rê bikeve, Pizişkiyan daxuyand ku ew ê li ser platforma navdewletî bi biryardarî berevaniyê di ber maf û berjewendiyên gelê Îranê de bike. Her wiha hate ragihandin ku wezîrê derve yê Îranê Ebas Eraqçî jî di şandê de cih digire û ji bo hevdîtinên berfireh beriya serokkomar gihîştibû New Yorkê.
Çavkaniyên dîplomatîk didin xuyakirin ku Îranê bi rêya Qeterê peyamên girîng derbarê şertên rawestandina şer û kêmkirina rageşiya leşkerî de gihandiye aliyê Amerîkayê. Tê çaverêkirin ku Pizişkiyan di axaftina xwe ya li pêşberî Neteweyên Yekbûyî de behsa dorpêçên aborî û helwesta welatê xwe ya li hemberî siyaseta Amerîkayê bike.
