Bi nêzîk bûna cejna qurbanê re, Saziya Malbatên Şehîdan li bajarê Hesekê amadekariyên cejnê dike. Gelek rêze çalakiyan pêk tîne, di êvara cejnê de erebeyan û mûman amade dikin, ji bo hemû malbat karibin biçin goristana şehîdan û mûman li ser gorên şehîdan pêxin.
Saziya Malbatên Şehîdan a Hesekê ji bo cejna qurbanê bi malbatên şehîdan re dibin alîkar û gelek amadekariyan dikin da ku karibin cejnê bi awayekî baş pîroz bikin.
Endamê Saziya Malbatên Şehîdan Ednan Şêx Mihemed, da zanîn ku cejna qurbanê cejna aştî û azadiyê ye û ev cejn li tevahî malbatên şehîdan pîroz kir û got: ‘Em wek malbatên şehîdan beriya cejnê malbatên xwe birêxistin dikin, mûm û girûpan amade dikin da ku bi awayekî giştî êvara cejnê derbasî goristana şehîdan bibin û mûmeyan li ser gorên şehîdan pêxin û di roja cejnê ya duyem û sêyem de girûpên ku hatine amadekirin sardana hemû malbatên şehîd û girtiyan bikin.’
Endama komîteya jin a Malbatên Şehîdan Necah Hewas, anî ziman ku ew ji bo cejnê bi hemû malbatên şehîdan re dibin alîkar û got: ‘Beriya cejnê em alîkariya zarokên şehîdan dikin, da ku karibin cejna xwe bi awayekî baş derbas bikin.’
Gulçîn Ehmê / Ilham Elî