Di van 2 rojane de, li herêma Cizîrê ya Rojavayê Kurdistanê, baraneke xurt bariya, bi vê barana zêde re rêjeya ava çeman zêde bû û li gelek bajaran jî golên avê çêbûn.
Ji ber lehiyê, menfezên pira li ser çemê Zirganê yê Til Temirê xetimîn, rêyên Til Temir-Zirganê, Til Temir-Serê Kaniyê qut bûn û tevgera çûn û hatinê asteng bû.
Şaredariyê dest bi paqijkirina çem û rêgarên pirê kir, da ku av biherike û jiyana xelkên li taxên nêzî çemê, nekeve xeteriyê.
Rêveberê Daneyên Avê yê Hesekê Endazyar Ebdulezîz Emîn hişyarî dabû şêniyên li ber çemê Xabûrê, ku gengaz e di demjimêrên bê de lehî çêbibin.
Emîn diyar kir ku ji ber barana zêde û herikîna ava çemên Cerceb û Zirganê li ser çemê Xabûrê, leza herikîna ava çemê di çirkeyekê de, 50 metre derbas kir.
Vê sibehê jî, ji ber bilindbûna ava çemê Xabûrê, av bi ser rêya M4 a li rojavayê Til Temirê de herikî.
