Şandeyek ji Partiya Yekîtiya Demokratîk (PYD) duh serdana Sekreteriya Giştî ya Karûbarên Siyasî ya Hikûmeta Veguhêz a Sûriyê li Şamê kir.
Şande ji Hevserokê PYD`ê Xerîb Hiso, Hevserokên Nivîsgeha Têkiliyên Giştî ya PYD`ê Sema Bekdaş û Silêman Ereb, endama Meclisa Giştî ya PYD`e Sureya Mustefa û Hesen Ebdella pêk tê.
Ebas Hisên û çend endamên Sekreteriya Giştî, pêşwaziya şandeyê kir.
Di hevdîtinê de pêşketinên siyasî yên heyî li Sûriye û herêmê, her wiha rêbazên xurtkirina diyaloga siyasî di vê qonaxê de, da ku aramî û têgihîştin di navbera aliyên cuda yên Sûriyê de bi pêş bikevin, hatin nîqaşkirin.
Her du aliyan peymana 29ˊê Çileyê ya di navbera Hêzên Sûriya Demokratîk (QSD) û Hikûmeta Veguhêz a Sûriyê de nîqaş kir.
Ji mijarên ku hatine nîqaşkirin, vegera koçberan bo herêmên wan, berdana dîlgirtiyan û mijara entegrasyonê û bandorên wê yên siyasî, leşkerî û rêveberî ne.
Di hevdîtinê de, her wiha fermana serokkomariyê ya jimare 13 a der barê taybetmendiyên Kurdan li Sûriyê de hat gengeşekirin.
Di heman demê de, li ser girîngiya misogerkirina mafên neteweyî û çandî yên gelê Kurd di çarçoveya Sûriyeke demokratîk û piralî de, ku mafên hemû pêkhateyan diparêze, hat tekezkirin.
