Ji bo xurtkirina aştiyê di navbera Îsraîl û Hemasê de civîn tên li darxistin.
Serokwezîrê Îsraîlê Benjamin Netanyahu ragihand ku ew bi Serokê Îstixbarata Misrê Hesen Mehmûd Reşad re civiya da ku plana Serokê Amerîkayê Donald Trump a ji bo Xezeyê bi pêşve bibe.
Ofîsa Netanyahu di daxuyaniyekê de eşkere kir ku di hevdîtinê de, pêşvebirina plana Trump, têkiliyên di navbera Îsraîl û Misrê de û xurtkirina aştiyê di navbera her du welatan de hat nîqaşkirin.
Hesen Reşad ji bo ketina alîkariyan bi Îsraîlî re hevdîtin kir
Her wiha Hesen Reşad ji bo ketina alîkariyan û derbaskirina astengiyên li pêşiya pêkanîna pêşniyara Trump bi rayedarên Îsraîlî re hevdîtin kir.
Hat parvekirin ku Reşad wê bi Nûnerê Rojhilata Navîn ê Amerîkayê Steve Witkoff re jî bicive.
Xelîl El-Heyya: Em ê peymana agirbestê bi cih bînin
Ji aliyê xwe ve, serokê Şandeya Danûstandinan û Berpirsê Tevgera Hemas li Xezeyê Xelîl El-Heyya îro piştrast kir ku ew xwedî îradeyek xurt in ku peymana agirbestê bi tevahî bicîh bînin.
Xelîl El-Heyya: Hewlên vegerandina termên Îsraîlî berdewam dikin
Xelîl El-Heyya anî ziman ku hewlên ji bo vegerandina termên Îsraîliyên ku li Xezeyê hatine girtin, berdewam dikin.
El-Heyya got ku tiştên ji navbeynkar û serokê Amerîkayê hatine bihîstin, piştrast dike ku şerê li Xezeyê bi dawî bûye.
Herî dawiyê jî Berdevkê Hemasê Hazim Qasim diyar kir ku bêçekkirina tevgerê mijara nîqaşê ye û destnîşan kir ku divê her gavek di vî warî de bi rêya lihevkirina neteweyî û diyaloga rasteqînî were avêtin.
Serokê Amerîkayê Donald Trump jî duh da zanîn ku ew ê derfeteke biçûk bide Hemasê, da ku peymana agirbestê ya li Xezeyê bi Îsraîlê re bi cih bîne, lê soz da ku ger Hemas vê yekê neke, ew ê wan ji holê rake.
