Girseyeke mezin a pêkhateyên Bakur û Rojhilatê Sûriyê ji bo beşdarî merasîma fermandarê Hêzên Ewlekariya Hundirîn-Heleb şehîd Ziyad Heleb (Ziyad Qedûr) ku 10’ê Çileyê di berxwedana Şêxmeqsûdê de şehîd bûbû, berê xwe didin Pakrewangeha Şehîd Dîcle.
Di merasîmê de dê nasnameyên endamên Hêzên Ewlekariya Hundirîn-Heleb Gerîla Amara û Leyla Qasim ên ku di berxwedana Şêxmeqsûdê de şehîd bûne, dê werin ragihandin. Her wiha dê cenazeyên şervanên Hêzên Komandos ên QSD’ê Malik û Birûsk Muxaric ên ku li Kobanê şehîd bûne, werin veşartin.
Berpirsên Rêveberiya Xweser, şervan û fermandarên QSD’ê, Hêzên Ewlekariya Hundirîn, partiyên siyasî, rêxistinên jin û ciwanan, saziyên olî, civakî, hunerî û çandî, şêx û rûspiyên eşîran dê beşdarî merasîmê bibin.
Cenazeyên şehîdan dê ji Navenda Meclisa Malbatên Şehîdan ber bi Pakrewangeha Şehîd Dîcle ve werin veguhastin û dê saet di 12.00’an de merasîm dest pê bike.
Meclisa Tevgera Civaka Demokratîk (TEV-DEM) a kantona Firatê ji bo şehîdan şîn ragihand û banga tevlêbûna merasîmê kir.
