Xwezaya Bakurê Kurdistanê bi salan e di bin gefa şîrketên enerjiyê de ye.
Ew xwezaya bihûşt rojane bi xirabkirin û talaneke mezin re rû bi rû dimîne.
Ev demek e gelî û zozanên Serhedê bûne armanca van şîrketan.
Niha bihûşta geliyê Perî û zozanên Gimgimê bi xetereyên mezin re rû bi rû mane.
Li herêmê, di van newal, gelî û zozanên bihûşt de mîna xwezayê berxwedana xelkê herêmê jî du meh li pey xwe dihêle.
Ji heft salî heya heftê salî niştecihên herêmê li ber deng û awazên zozanan li ber xwe didin.
Projeya Santrala Enerjiya Jeotermal (JES) ku ji aliyê şîrketa IGNIS H2 A.Ş. ya Amerîkayê ve li gundên sînor ên navbera navçeya Kanîreşê ya Çewlîgê û navçeya Gimgimê ya Mûşê tê plankirin.
Li gundê Xwarikê yê navçeya Gimgimê ya Mûşê, berxwedana gel a li dijî projeya Santrala Enerjiya Jeotermal (JES), di roja 61`emîn de bi biryardarî û hevgirtinê didome.
"Em ê nehêlin kes dest bide axa me"
Nobeta ku ji aliyê Meclîsa Ciwanan a Platforma Ekolojiyê ya Gimgimê ve hatiye destpêkirin, ji aliyê şêniyên gundê Hemûg û Çaxlek ve tê domandin.
Di roja 61`emîn a çalakiya nobedariyê ya li dijî projeya JESê de, li ser konê nobebdariyê wiha hatiye nivîsandin:
"Yek dayika me hemûyan heye, ew jî Dayika Erdê ye.
Em ê nehêlin kes dest bide axa me ya li Vartoyê. Jinên Vartoyê vê talankirinê red dikin."
Proje bandorê li 22 gundên ku di navbera Kanîreşê û Gimgimê de ne dike
Projeya santrala jeotermal dê bandorê li 22 gundên ku di navbera Kanîreşê û Gimgimê de ne bike.
Pispor û welatiyên ku dê ji projeyê bandor bibin, dibêjin ku ev proje ne tenê ji bo jîngeh û heywanan, lê di heman demê de jiyana wan bi xwe jî rasterast tehdît dikin .
Gundên ku dê li Gimgimê di bin bandora projeya JES'ê de bin:
Tanzik, Tatan, Hemug, Çorsan, Xwarik, Qasiman, Ameran, Zengena, Mengel, Kuzik, Civarkan, Caneseran, Xaşxaş, Uskira, Şorik, Şeman, Gadizan, Badan.
Gundên Kanîreşê yên ku dê ji projeya JES'ê bandor bibin ev in : Aynik, Licik, Şorik, Çêrmûk, Siqavêlan û Qerxabazar.
