Di salvegera bûyera Rojîn Kabaîş de li gelek bajaran bi pêşengiya Tevgera Jinên Azad (TJA) çalakî hatin lidarxistin.
Di çalakiyan de gel hêrsa xwe ya li hember xemsariya darazê û bêceza hiştina sûcdaran anî ziman û banga girtina wan hat kirin.
Dîlan Başboga: dadgeh bêdeng bû lê em bêdeng namînin
Li Agirîyê ji bo Rojîn Kabaîş, siyasetmedar û rêxistinên jinan çalakî li darxistin. Di çalakîyan de banga mezinkirina têkoşînê li dijî pergala ku delîlan tune dike hat kirin.
Çalakvana TJA’yê Dîlan Başboga piştî meşê axivî û got:
"Ev pêvajo encama paşguhkirina dadgehê û pergala serweriya mêr e."
DNA’yên li ser laşê rojînê yê kî ye?
Li Şirnex û Êlihê jî ji bo Rojîn Kabaîş daxuyani hat dayîn. pankartên "Kujer diyar in, edalet li ku derê ye?" "dadgeh bêdeng bû, em ê bêdeng nebin!", "Kujerên Rojînê çima tên parastin?" hate hilgirtin.
"Bi bêdengiyê em belav dibin"
Rêxistinên jinan, xwendekarên zanîngehê û rêxistinên saziyên sivîl li Amedê li Qada Şêx Seîd derbarê ronîkirina mirina biguman a Rojîn Kabaîş de çalakiya rûniştinê pêk anîn.
Hevala Rojîn Kabaîş, Cemîle Eren daxuyanî xwend û da zanîn ku Rojînê întîhar nekiriye û got: “Bêdeng nemînin bi bêdengiyê em parçe parçe belav dibin."
Şukran Efeturk: Em pîroziya jiyana jinan diparêzin
Meclîsa Jinan a DEM Partiyê û TJA'yê li Edeneyê daxuyanî da çapemeniyê. Jinan daxwaza ronîkirina qetilkirina Rojîn Kabaîş û cezakirina kujeran kirin.
Aktîvîsta TJA’yê Şukran Efeturk got:
"Eşkerekirina rastiya ku di laşê Rojîn de veşartî ye tê wateya parastina pîroziya jiyana jinan. Em ê bi dengê Rojînê li dijî tarîtiya serdest a mêran li ber xwe bidin."
"Sîstema bêcezatiyê her roj jinan qetil dike"
Her wiha li Riha,Dilok, Muş û Wanê jî bi daxuyaniyên cuda daxwaza eşkerekirina kujerên Rojîn Kabaiş û hemû jinan hat kirin.
Di çalakiyan de hat gotin ku cînayetên jinan ne pirsgirêkek takekesî ye, pirsgirêkek sîstemîk e.
Serokê baroya Wanê: Divê destdirêjiya li hember rojînê bê lêpirsîn
Serokê Baroya Wanê Sînan Ozaraz diyar kir ku delîlên nû yên di dosya Rojîn Kabaîş de derketin holê îhtimala destavêtinê zêde kiriye û got, êdî ji xwekuştinê wêdetir îhtimala kuştinê mezin bûye.
