Di navbera hilweşîna rejîma Baasê li Şamê di 8ê Kanûna 2024`an de û 20`ê îlona 2025`an de, şaneyên DAIŞ`ê 153 êrîş li Bakur û Rojhilatê Sûriyê pêk anîn. QSD`ê dibêje ev rêje nîşan dide ku hewldanek DAIŞê ye ji bo ji nû ve rêxistinkirin û berfirehkirina çarçoveya operasyonan e.
QSD`ê: Li dijî daiş`ê me 70 operasyon pêk anîn
Berdevkê fermî yê QSD`ê daxuyaniya Fermandariya Giştî ya Hêzên Sûriya Demokratîk xwend û da zanîn ku wan bi hevahengiya berdewam bi Hevpeymaniya Navneteweyî re, hêzên wan di 10 mehên borî de, rêze operasyonên pêşwext ên meydanî li dijî şaneyên DAIŞ`ê pêk anîne.
Bi tevahî, hêzên wan, bi piştgiriya Hevpeymaniya Navneteweyî, 70 operasyon pêk anîn, di nav de 3 operasyonên berfireh, ku tê de 95 çekdar, di nav de 3 serkirde hatin girtin.
Her wiha 6 çekdar, di nav de 2 serkirde hatin kuştin û gelek çek, cebilxane û belgeyên nasnameyê hatin desteserkirin.
Di êrîşên çekdarên daiş`ê 30 şervanên QSD şehîd bûn
Di daxuyaniyê de, diyar bû ku 30 şervanên QSD`ê şehîd bûn, 12 birîndar bûn û 6 sivîl jî di êrîşên çekdarên DAIŞ`ê de jiyana xwe ji dest dan.
QSD`ê: Em ê heta dawiyê şerê daiş`ê bikin
Hêzên Sûriya Demokratîk ev yek piştrast kir ku gefa DAIŞ`ê û şerê li dijî wê, bi dawî nebûye û ew hem li ser ewlehiya herêmê û hem jî li derve gefeke cidî ye.
QSD`ê hevkariya bi Hevpeymaniya Navneteweyî re hêmanek girîng e ji bo pêşîgirtina li vegera DAIŞê, û ew daxwaza piştgiriya operasyonel û lojîstîkî ya bêtir dike.
Pêwîstî bi hevkariya navneteweyî heye ji bo çareserkirina şer
Li gorî vê yekê, pêwîstî bi hevkariya navneteweyî ji bo berdewamkirina vî şerî û parastina aramî û ewlehiya deverê heye.
“Em soza xwe nû dikin ku em ê şerê li dijî daiş`ê bidomînin”
Di dawiya daxuyaniyê de, berdevkê Hêzên Sûriya Demokratîk got: Em soza xwe nû dikin ku em ê şerê xwe yê li dijî DAIŞ`ê heta ku bi tevahî ji holê were rakirin û pêşerojek ewle û aram were misogerkirin, bidomînin.