Artêşa Îsraîlê bê navber êrîşên xwe li ser Xezayê berdewam dike.
Li gorî zanyariyên ku ji çavkaniyên tibî û herêmî hatine girtin, balafirên şer ên Îsraîlê li Taxa Derec a ku dikeve navenda bajarê Xezayê, maleke sivîlan rasterast kirin hedef.
Di vê êrişê de 9 kesan jiyana xwe ji dest dan, piraniya wan jin û zarok in.
Êrîşên li ser bakur û başûrê Xezayê
Her wiha hat ragihandin ku li nêzî Otela Meştel a li bakurê rojavayê Xezayê jî malek hat bombebarankirin û di encamê de 4 welatî hatin kuştin.
Li aliyê din, keştiyên şer ên artêşa Îsraîlê li peravên bajarê Refahê yê li başûrê Xezayê êrîşî masîgiran kirin.
Di vê êrîşê de masîgirek hat kuştin û 3 masîgirên din jî bi giranî birîndar bûn.
Bîlançoya şer her ku diçe giran dibe
Ji destpêka şerê dijwar ê li Xezayê ve, bîlançoya qurbaniyên sivîl gihîştiye asteke metirsîdar.
Li gorî daneyên dawî, hejmara qurbaniyan ji 73 hezarî derbas bûye û ya birîndaran jî ji 173 hezarî zêdetir e.
Tevî bangên navdewletî yên ji bo rawestandina şer, pevçûn û bombebaran hîn jî li seranserî herêmê berdewam dikin.