Îranê dan û standinên bi DYA'yê re rawestandin
Di pêşketineke nû ya di navbera Dewletên Yekbûyî yên Amerîka û Îranê de, Îranê eşkere kir ku wê dan û standinên bi Washingtonê re rawestandine.
Li gorî ajansa Mehr a Îranî, Tehranê heta niha jî, bersivek nedaye pêşniyara peymana dawî ya bi Dewletên Yekbûyî yên Amerîkayê re, ku armanc dike dawî li aloziyên di navbera her du aliyan de bîne.
Rayedarên Tehranê jî diyar kirin ku êdî mayîna li ser maseya dan û standinan bê wate ye.
Tehranê ev yek bi domandina êrîşên Îsraîlê yên li ser Libnanê û nekarîna Waşingtonê di astengkirina van êrîşan de, girêda.
Qaanî: Êrîşên li ser Libnanê wê bibin sedema şerekî berfireh li herêmê
Her wiha fermandarê Hêza Qudsê Îsmaîl Qaanî ku baskê destwerdana derve ya Supaya Pasdarên Îranê ye, bi daxuyaniyekê hişyarî da Dewletên Yekbûyî yên Amerîkayê û got:
"Êrîşên Îsraîlê, yên li ser Libnanê ku bi piştgiriya Amerîkayê têne kirin, dikarin rê li ber çalakiyên hevbeş ên Îran û hevalbendên wê li herêmê vekin.
Berdewamiya êrîşên Îsraîlê, wê bibe sedema ku em çarçoveya zextên xwe li ser rêyên keştîvaniyê yên navneteweyî li Deryaya Sor û Kendava Erebî berfireh bikin"
Trump: Rawestandina dan û standinan nayê wateya ku wê şer dest pê bike
Der barê vê yekê de, Serokê Amerîkayê, daxuyaniyek da û diyar kir ku ew rawestandina dan û standinan asayî dibîne û got:
“Ev rewş nayê wê wateyê ku dê bombebaran dest pê bikin, lê dorpêça deryayî ya li ser benderên Îranê dê bidome.”
Trump: Rawestandina dan û standinan min dilgiran nake
Trump diyar kir ku wî hîn nûçeyên vekişîna Îranê ya ji maseyê ji kanalên fermî nebihîstiye û wiha lê zêde kir:
“Ev îhtîmal jî min dilgiran nake.
Eger wan hevdîtin rawestandibin, ev yek asayî ye.
Carinan bêdengmayîn û rawestan dikare encamên gelekî baştir bide.
Derketina Tehranê ya ji maseyê, ne nîşaneya operasyoneke leşkerî ye.”