Di berdewamiya girtin û zextên hêzên ewlehiyê yên hikûmeta Îranê de li ser welatî û çalakvanên Rojhilatê Kurdistanê, di geşedana herî dawî de, Kazîwe Perwîzniya ku xelka Mehabadê ye û zêdetirî du hefteyan e hatiye girtin, piştî lêpirsînê li cihekî nenas hat veguhastin ji bo Girtîgeha Navendî ya Urmiyeyê.
Li gorî rapora rêxistinên mafên mirovan, li Rojhilatê Kurdistanê ew kes bi tawana pişgiriya xwepêşandanan hatiye girtin.
Hîn jî bêyî ku çarenûsa wê diyar bibe, di zindanê de tê girtin û ji mafê peywendî û dîtina malbatê, her wiha ji mafê dîtina parêzeran hatiye bêparkirin.
Li Bokan, Mehabad û Seqizê 4 welatî û çalakvanên kurd hatine girtin
Li bajarê Bokanê, hêzên ewlehiyê bi ser cihê karê nivîskar û çalakvanê çandî yê naskirî "Cefer Muxtarî Fer" de girtin.
Hêzan piştî kontrolkirina dikana wî, çûn mala wî jî û dest danîn ser kelûpelên wî yên taybet mîna komputer, pirtûk û destnivîsên wî.
Her li bajarê Bokanê, wênegir û girtiyê siyasî yê berê "Elî Zulfî", roja borî li dikana xwe hat girtin.
Hêzên ewlehiyê bêyî biryara dadwerî, ji bilî girtina wî, erebeya wî ya taybet jî birine.
Elî Zulfî berê jî bi tawana "propagandaya li dijî rêjîmê" cezayê girtîgehê lê hatibû birîn.
Rê nayê dan ku hin girtî bibin xwedî parêzer
Di berdewamiya zextan de, li bajarê Seqizê, ciwanekî Kurd ê bi navê Mehran Behramî, li cihê karê xwe ji aliyê hêzên ewlehiyê ve hat girtin û birin cihekî nenas.
Heta niha ti agahî li ser sedema girtina wî yan tawanên li ser babetê nehatine eşkerekirin. Ev girtin bêyî ti belgeyên yasayî û bêyî berçavgirtina mafên bingehîn ên mirovan tên kirin.
Nebûna zelalmendiyê di dosyayên van kesan de û bikaranîna rêbazên tundûtûj li dijî welatiyan, bûye sedema fikarên mezin di nav xelkê û rêxistinên mafên mirovan de.
Hêzên ewlehiyê ne tenê bêyî biryara dadgehê tev digerin, her wiha mafê bingehîn ê dîtina parêzeran jî nadin girtiyan.
