Encumena Niştimanî ya Kurd a Sûriyê (ENKS) di salvegera 52`yemîn a bicihanîna Kembera Erebî de daxuyaniyek belav kir.
ENKS'ê diyar kir ku Kembera Erebî yek ji xetertirîn polîtîkayên nijadperest û şovenîst bû û got:
Bi rêya Kembera Erebî projeyê erdên Kurdan ji wan hatin standin û li Ereban hatin belavkirin.
Armanca sereke ya projeya Kembera Erebî guhertina demografiyê ya bi zorê bû.
ENKS: Armanca projeya Kembera Erebî guhertina demografiyê bû
ENKS'ê di daxuyaniya xwe de ragihand ku 24ê Hezîrana 1974an, birêvebiriya Partiya Beasê ya Sosyalîst biryara hejmar 52 derxist û got:
“Bi hinceta "Çaksaziya Çandiniyê" erdên Kurdan ên ku di salên 1965, 1966 û 1967an de dest danîbûn ser hatin dabeşkirin.
Ev erd li ser sînorê Tirkiyeyê bûn. Kûrahiya wan 10 heta 15 kîlometre û dirêjahiya wan jî 275 kîlometre bû.
Rûberê van erdan bi giştî 2 milyon donim bû.
Hinceta wan a wê demê ew bû ku ji ber çêkirina Bendava Feratê av bi ser hinek gundên Ereban de girtiye, lewma ew Ereb anîn û li ser erdên Kurdan bi cih kirin.
ENKSyê destnîşan kir ku 24ê Hezîranê ji bo gelê Kurd rojeke reş e û da zanîn:
"Wê demê 40 gundên Ereban hatin avakirin.
Erebên ji Minbic û Tebqayê anîn û li van gundan bi cih kirin.
Li her gundekî nêzîkî 100 malbatî hatin bicihkirin.
Hemû xizmetguzariyên wekî av, elektrîk, dibistan, rê û telefon ji bo wan hatin dabînkirin.
Ev di demekê de bû ku li ti gundên Kurdan ev xizmetguzarî tunebûn.”
Encumenê bang li hemû hêzên niştimanî, demokratîk û civaka navneteweyî kir ku hebûna gelê Kurd di destûrê de were naskirin.
Her wiha ENKSyê xwest ku hemû siyaset û projeyên nijadperest ên wekî Kembera Erebî werin hilweşandin.
Di dawiya daxuyaniyê de hat destnîşankirin ku divê Sûriyeyeke nû ya demokratîk, nenavendî û wekhev were avakirin.
