Piştî şerê Ermenistan û Ezerbaycanê, Hikûmeta Ermenistana ku nêzî Rûsyayê bû tewereya xwe guhert û niha xwe nêzî Amerîkayê dike.
Ev yek di civîna dawî ya Serokê Amerîkayê û Serokwezîrê Ermenistanê Nîkol Paşînyan de, şênbertir bû.
Serokê Dewletên Yekbûyî yên Amerîkayê Donald Trump li ser medya dijîtal ragihand ku ew ê piştgiriya xwe ya "tevahî û bêkêmasî" bide Serokwezîrê Ermenistanê , ji bo hilbijartinên parlementoyê yên ku di Hezîranê de dê werin lidarxistin.
Trump Paşînyan wekî "dost û rêberê mezin "bi nav kir û tekez kir ku wî welatê xwe "xurt, dewlemend û pir ewle" kiriye.
Trump diyar kir ku "Nikol bi tevahî vîzyona min a ji bo aştî û serfiraziya ji bo Ermenistan û tevahiya herêma Başûrê Qefqasyayê bi par ve dike."
Trump serdana dawî ya Wezîrê Derve yê Amerîkayê Marco Rubio ji bo Ermenistanê bi bîr xist û destnîşan kir ku di wê serdanê de "li ser peymanên girîng pêşketineke girîng" ji bo her du welatan çêbûye.
Trump zêde kir ku Amerîka û Ermenistan dê di demeke nêzîk de bi hev re bingeha "Rêya Trump ji bo Aştî û Serfiraziya Navneteweyî" deyînin ku dê Qefqasyaya Başûr "veguherîne" û alîkariya şîrketên enerjiyê yên Amerîkî bike, da ku ji Asyaya Navîn bigihîjin Amerîkayê.
Trump gotina xwe bi peyva "Bi alîkariya Nikol, em ê DYAyê, Ermenistan, Qefqasyaya Başûr û Asyaya Navînê bigihînin astên ku berê qet negihîştine", "Ermenistanê Dîsa Mezin Bikin." bi dawî kir.
