Li gelek bajarên Bakurê Kurdistanê û Tirkiyê pîrozbahiyên berfireh ên Newrozê hatin lidarxistin û hîn jî dê li gelek bajaran pîrozbahî were kirin.
Di Newroza îsal de bal hat kişandin li ser girîngiya xurtkirina yekîtiya demokratîk a Kurdan.
Her wiha vê rojê wekî roja berxwedan, serhildana li dijî zilmê hate pênasekirin.
Li bajarê Amedê bi sed hezaran kes li Qada Newrozê bi ruhê yekîtiyê û vîna gelê Kurd li dijî hemû astengiyan û zilmê Newroza xwe pîroz kirin.
Welatiyan piştgirî dan Pêvajoya Aştî û Civaka Demokratîk.
Dîsa xelkên navçeya Mamaka Enqereyê agirê Newrozê pêxistin û girse bi duruşmên “Li hundir û derve tecrîdê parçe bike” û “Kurdistan ji bo faşistan goristan” berzekirin.
Li Îzmîrê jî li Qada Cumhuriyetê bi ruhê berxwedanî û yekîtiyê gel Newroza xwe ya 2026'an pîroz kirin.
Endamê Meclîsa Partiyê (PM) ya DEM Partiyê Sabrî Gul di derbarê vê rojê de wiha axivî:
"Kurd îro riya sêyemîn ava kirine; ne mecbûr in ku hêzên mêtinger û ne jî dîktatoran qebûl bikin.
Kurd wê bi hêza xwe ya cewherî û bi yekîtiya xwe jiyaneke birûmet ava bikin. Kurd ne piştgirên dagirker, mêtinger û dîktatoran in. Kurd piştgirên azadî, aştî û wekheviyê ne."
Di Newroza îsal de li navçeya Darica Kocaeliyê 8 kes ji aliyên polîsê Tirkiyê ve hatin binçavkirin.
Parlamenterê DEM Partiyê yê Kocaeliyê Omer Farûk Gergerlîoglû destnîşan kir ku tevî astengiyên polîsan jî pîrozbahî hatin lidarxistin û wiha got:
“Pirsgirêka Kurd dewletê derxist. Ez wek Tirkekê bûm şahidê tiştên ku bi serê Kurdan tên kirin û bi ser vê yekê bûm parastvanên herî mezin ê mafan.
Me got bila zarok nemirin dayik negirîn. Lê belê gelek binpêkirin hatin jiyandin.
Divê êdî ev bi dawî bibin. Rojhilata Navîn bûye gola xwînê. Di vê pêvajoyê de girîng e ku aştî were tercîhkirin.
