Fermandariya YBŞ'ê destnîşan kir ku ew îro ne tenê trajediyê radiwestînin, ew piştrast dikin berxwedana ku ji bin xirbeyan derketiye holê hîn jî zindî ye, bi israre û li ser rêya azadî û rûmetê berdewam dike.
YBŞ’ê di daxuyaniya xwe de diyar kir ku ew ne hêzeke demkî ne, hêzeke parastinê ya rewa û mayînde ne, ku ji dilê êşa Êzidiyan û ji baweriya wan a kûr çêbûye.
Fermandariyê got: "Aliyên ku parastina Êzidiyan nekirin û erka xwe bi cih neanîn, îro heman alî ji hêzên Êzidiyan daxwaza çek danînê dikin. Ev daxwaz bi armanca çêkirina bingehekê ji bo fermaneke nû ye. "
YBŞ’ê destnîşan kir ji ber vîzyona Rêberê Gelê Kurd Abdullah Ocalan ya rizgarîxwaz û mirovahiya wî ya şoreşger di hişmendî û berxwedana Êzidiyan de xalek werçerxê nîşan da ye, ew nikarin vê salvegerê bêyî ku spasî û dilsoziya xwe ya ji bo wî diyar bikin derbas bikin.
Her wiha gotin ku banga Ocalan a dîrokî ya ji bo parastina Şengalê û Êzidiya qêrîneke wijdanî bû ku bi hezaran kes rizgar kir û rê li ber avakirina avahiyeke berxwedanê ya rastîn vekir.
Fermandariya YPŞ'ê rol û pêşengiya dostên civaka Êzidiyan, Gerîlayên Kurdistanê û şervanên YPG û YPJ di rizgarkirina Şengalê de bi bîr xist û got: Wan bê şert û merc û bê dudilî bersiva banga alîkariyê dan, rêyên ewlehî û korîdora mirovahî vekirin û mil bi mil bi me re li dijî çeteyan şer kirin. Bê guman bêyî hebûn û pêşengiya wan, hejmara qurbaniyan dê gelek qat zêdetir bûya.
Yekîneyên Berxwedana Şengalê di dawiya daxuyaniya xwe de destnîşan kir ku hewldanên ji bo bêbandorkirina projeya xweparastinê li Şengalê û dorpêçkirina hêzên Êzidiyan, berdewama fermanê ya bi rêbazên nerm e û daxwaz ji gel kir ku ji hêzên xwe bawer bin û xwedî lê derkevin.