بڕیارە لە سەرەتای مانگی داهاتوودا و دوای ناسینەوەیان لە بەغدا، ڕووفاتی ٢٥ هاونیشتمانیی ئێزدی بۆ شنگال بگەڕێنرێنەوە و لە ڕێوڕەسمێکدا بەخاک سپێردرێن. ئەم کاروانە قۆناغی نۆیەمی گەڕاندنەوەی ڕووفاتەکان پێکه دەهێنێت و بەمەش کۆی گشتیی ڕووفاتە گەڕێنراوەکان لە بەغداوە دەگەڕێتەوە سەر ٢٩٥ ڕووفات.
بەپێی ئامارەکان، لە کۆی ٩٣ گۆڕی بەکۆمەڵی دۆزراوە لە شنگال، تاوەکو ئێستا ٦٨ گۆڕ هەڵدراونەتەوە و ڕووفاتی ٧٩٨ قوربانی بۆ پشکنینی ناسینەوە رەوانەی پزیشکی دادوەریی بەغدا کراون.
جێگەی ئاماژەیە کە لە هێرشەکەی داعش بۆ سەر شنگال، زیاتر لە ٦ هەزار ئێزدی ڕفێندران، کە تێیدا ٣ هەزار و ٥٩٠ کەس ڕزگار کراون و چارەنووسی ٢ هەزار و ٥٥٤ کەسی تریان هێشتا نادیارە.