سروشتی دەوڵەمەند و فرەچەشنیی پارێزگای مووش لە باکوری کوردستان، ساڵانە سەدان هەنگەوان ڕاکێشی ئەو ناوچەیە دەکات، بە شێوەیەک کە لە وەرزی هاویندا ژمارەی شانەی هەنگ لە 64 هەزارەوە بۆ زیاتر لە 125 هەزار شانە بەرز دەبێتەوە.
بەهۆی بوونی هەزاران جۆرە گوڵ و ڕووەکی دەگمەنی وەک "چاچور"، هەنگوینی ئەم ناوچەیە کوالێتییەکی ناوازەی هەیە، بەڵام ئێستا ئەم پیشەیە ڕووبەڕووی ئاستەنگی گەورە بووەتەوە.
تێچووی گواستنەوەی شانەکان بە ڕێژەی 100٪ زیادی کردووە و گەیشتووەتە 85 هەزار لیرە، لە کاتێکدا حکومەت هیچ پاڵپشتی و هاندانێک پێشکەش بە هەنگەوانان ناکات.
هاوکات بڵاوبوونەوەی هەنگوینی ساختە لە بازاڕدا زیانی گەورەی بە بەرهەمهێنەران گەیاندووە و داوا دەکرێت ڕێگریی لێبکرێت.
ئەمەش لە کاتێکدایە بەشێکی زۆری هەنگەوانان بە شێوازی خێزانی و تەنانەت لە ڕێگەی پیتاندنی دەستکرد و زانستییەوە کار بۆ بەرهەمهێنانی شاژنی نوێ و پاراستنی ئەم پیشەیە دەکەن.