کۆنگرەی ستار لە ڕاگەیەندراوێکدا دژایەتیی خۆی بۆ هەر هەوڵێک دەربڕی کە ئامانجی سنووردارکردنی خوێندن بە زمانی دایک بێت لە سووریا، و جەختی لەوە کردەوە کە زمان و دەستکەوتە نەتەوەییەکان هێڵی سوورن.
لە ڕاگەیەندراوەکەدا هاتووە، هەرچەندە دانپێدانانی فەرمی بە زمانی کوردی هەنگاوێکی گرنگە، بەڵام سنووردارکردنی بۆ چەند کاتژمێرێکی کەم یان کردنی بە وانەیەکی هەڵبژێردراو قبوڵکراو نییە، چونکە کاریگەریی نەرێنی لەسەر دەروونی منداڵان و پرۆسەی پەروەردە دروست دەکات.
کۆنگرەی ستار ئاماژەی بەوەش داوە کە پاش ساڵانێک لە سیاسەتی نکۆڵیکردن و سڕینەوەی ناسنامە، پەروەردە بە زمانی دایک لەگەڵ شۆڕشی ڕۆژاڤادا بووەتە بەشێکی دانەبڕاوی ژیان، و داوای لە هەموو ژنان کرد کە تێکۆشانیان فراوانتر بکەن بۆ پاراستنی ئەم دەستکەوتە مەزنە.